Lockdown at kalusugan

LOCKDOWN AT KALUSUGAN

lockdown ay huwag tratuhing panahon ng bakasyon

kundi paano bubuhayin ang pamilya ngayon

suriin ang lipunan, huwag sa lockdown makahon

pag-isipan kung paano tayo makakaahon

lockdown ay hindi rin naman solusyon sa pandemya

pantapal na solusyon lang ito para sa masa

talagang solusyon ay paunlarin ang sistema

ng kalusugan na makakaagapay ang iba

di ba't dapat lakihan ang badyet sa kalusugan?

di ba't buong health care system ay paunlarin naman?

di ba't dapat libre ang mass testing sa mamamayan?

di ba't contact tracing ay paigtingin, pag-igihan?

may lockdown upang di tayo magkahawaang tunay

upang malayo sa sakit at di agad mamatay

lockdown ay panahon upang tayo'y makapagnilay

lalo't dahil sa pandemya'y di tayo mapalagay

Pandaigdigang Araw ng Kalusugan sa Abril

ikapito, dapat may pagkilos na rito dahil

dapat tuligsain ang palpak na rehimeng sutil

na pagpatay lang ang alam, dapat itong mapigil

- gregoriovbituinjr.

* litratong kuha ng makatang gala habang naglalakad kung saan-saan

Soneto sa lockdown

Soneto sa lockdown

Lockdown na naman, at tahimik ang mga lansangan

Ah, sana ganito'y hindi na panahon ng tokhang

Kundi panahon ng pagninilay sa kaligtasan

Dumungaw man sa bintana'y walang nag-iiyakan

Alam ko, sapagkat wala nang pinaglalamayan

Walang lalabas kahit anong init sa tahanan

Nawa'y hulihin lang ang lalabag, walang pagpaslang

Nais kong itulog na lang bawat alalahanin

At managinip habang di pa maarok ang lalim

Ng laot nitong samutsaring pangamba't panindim

Alagatain ang mutya habang narito't gising

Mutyang diwatang naninilay sa gabing madilim

Ah, may curfew na, dapat na ring maging matiisin

Ngunit nais kong lumabas, bibili ng pagkain.

- gregoriovbituinjr.